ဒီနေ့ သင်ကြားပေးမယ့် ဘာသာရပ်လေးကတော့ Fashion Design လောကမှာ အရေးအကြီးဆုံးအဆင့်တွေထဲက တစ်ခုဖြစ်တဲ့ "Mood board ကနေ Collection တစ်ခုအဖြစ် ပုံဖော်ဖန်တီးမှုလုပ်ငန်းစဉ်" ပဲ ဖြစ်ပါတယ်။
"Designer တစ်ယောက်ရဲ့ ခေါင်းထဲက စိတ်ကူးစိတ်သန်းလေးတစ်ခုကနေစပြီး ကမ္ဘာကျော် ဖက်ရှင်ပြပွဲကြီးတစ်ခုလုံးကို လွှမ်းခြုံနိုင်တဲ့ အံ့မခန်း Collection ကြီးတစ်ခု ဖြစ်ပေါ်လာနိုင်တယ်ဆိုတာ သင်သိပါသလား။ ဒီလို ဖြစ်လာဖို့အတွက် လျှို့ဝှက်ချက်က ဘာများလဲ။ Fashion Design ဆိုတာ ပုံဆွဲတာ၊ အပ်ချုပ်တာ သက်သက်မဟုတ်ပါဘူး။ ဒါဟာ ခံစားမှုတွေကို အမြင်အာရုံနဲ့ ဖော်ပြခြင်း၊ စိတ်ကူးစိတ်သန်းတွေကို လက်တွေ့အဖြစ် အသက်သွင်းခြင်း၊ ပြီးတော့ customer နဲ့ အဆက်အသွယ်လုပ်ခြင်းတို့ ပါဝင်တဲ့ အနုပညာတစ်ခုပါ။ အဲ့ဒီလို စိတ်ကူးအိပ်မက်တွေကနေ လက်တွေ့ဆန်တဲ့ အဝတ်အစားတွေအဖြစ် ဘယ်လို ပြောင်းလဲလာလဲဆိုတာ ဒီနေ့ အမတို့ အတူတူ လေ့လာသွားကြပါမယ်။
(1) Mood board – ဖန်တီးမှုရဲ့ အစပြုရာ
- အမတို့ Fashion Design လုပ်ငန်းစဉ်ရဲ့ ပထမဆုံးနဲ့ အရေးအကြီးဆုံးအဆင့်ကတော့ Mood board ကို ဖန်တီးတာပါပဲ။ Mood board ဆိုတာ စာလုံးပေါင်းက 'မွတ်ဘုတ်' လို့ ဖတ်ရပေမယ့် မြန်မာလို အလွယ်တကူ မှတ်သားနိုင်အောင် "အာရုံခံစားမှု board" လို့ ခေါ်ဆိုနိုင်ပါတယ်။ ဒီ board ဟာ ကိုယ်စုစည်းချင်တဲ့ Collection တစ်ခုလုံးအတွက် ဗဟိုချက်မ၊ ဦးတည်ရာလမ်းကြောင်း၊ ပြီးတော့ ကိုယ့်ရဲ့ စိတ်ကူးအမြင်တွေကို တခြားသူတွေနဲ့ ဆက်သွယ်ပေးမယ့် အမြင်အာရုံဆိုင်ရာ ကိရိယာတစ်ခုပဲ ဖြစ်ပါတယ်။
1. Mood board ဆိုတာ ဘာလဲ?
Mood board ဆိုတာကတော့ ကိုယ့်ရဲ့ ဒီဇိုင်းစိတ်ကူးတွေကို အမြင်အာရုံအားဖြင့် ဖော်ပြတဲ့ collage board (သို့မဟုတ်) digital board တစ်ခုပါပဲ။ board မှာ inspiration ပုံတွေ၊ color တွေ၊ fabrics နမူနာတွေ၊ keywords တွေ၊ materials တွေ စသဖြင့် ကိုယ့်ရဲ့ စိတ်ခံစားမှု၊ စိတ်ကူးစိတ်သန်းတွေကို လှုံ့ဆော်ပေးနိုင်တဲ့ အရာအားလုံးကို စုစည်းထားနိုင်ပါတယ်။
2. ဘာကြောင့် Mood board ကအရေးကြီးတာလဲ?
Designer တစ်ယောက်အနေနဲ့ ဒီဇိုင်းစဆွဲတဲ့အခါ အစပိုင်းမှာ စိတ်ကူးတွေက ပျံ့လွင့်နေတတ်ပါတယ်။ Mood board က ဒီပျံ့လွင့်နေတဲ့ စိတ်ကူးတွေကို စုစည်းပေးပြီး တစ်သားတည်းကျတဲ့ ဖက်ရှင် Collection တစ်ခုဆီ ဦးတည်သွားဖို့ ကူညီပေးပါတယ်။
– ဦးတည်ချက်ပေးခြင်း (Direction): ကိုယ့်ရဲ့ဒီဇိုင်းအတွေးတွေကို ပုံဖော်ပေးမယ့် အဓိက အကြောင်းအရာ၊ အရောင်အသွေး၊ အသွင်အပြင်တွေကို ရှင်းရှင်းလင်းလင်း မြင်သာစေပါတယ်။
– ဆက်သွယ်မှု (Communication): ကိုယ့်ရဲ့ အဖွဲ့သားတွေ၊ မန်နေဂျာတွေ၊ သို့မဟုတ် customer တွေကို ကိုယ့်ရဲ့ ဒီဇိုင်းအမြင်တွေကို အလွယ်တကူ ရှင်းပြနိုင်တဲ့ အကောင်းဆုံးနည်းလမ်းပါ။ “ဒီ Collection က စိတ်လှုပ်ရှားစရာ ကောင်းတယ်” လို့ ပြောတာထက် Mood board တစ်ခုနဲ့ ပြသလိုက်တဲ့အခါ လူတိုင်းက သဘောပေါက် နားလည်သွားကြပါတယ်။
– ဖန်တီးမှုအားလှုံ့ဆော်ခြင်း (Inspiration): ဒီဇိုင်းဆွဲရင်းနဲ့ idea block နေတဲ့အခါ Mood board ကို ပြန်ကြည့်လိုက်ခြင်းအားဖြင့် အိုင်ဒီယာအသစ်တွေ ထပ်ရနိုင်ပါတယ်။
3. ထိရောက်တဲ့ Mood board ဘယ်လိုဖန်တီးမလဲ?
Mood board တစ်ခုဖန်တီးဖို့အတွက် မှန်ကန်တဲ့ နည်းလမ်းဆိုတာ မရှိပါဘူး။ ဒါပေမယ့် ဒီအဆင့်တွေကို လိုက်နာမယ်ဆိုရင်တော့ ပိုပြီး ထိရောက်မှာပါ။
– သုတေသန (Research): စိတ်ကူးအမြင်တွေ ရှာဖွေဖို့အတွက် အပြင်ကို ထွက်ပါ။ ပြခန်းတွေသွားပါ၊ သဘာဝတရားကို လေ့လာပါ၊ ရုပ်ရှင်ကြည့်ပါ၊ စာအုပ်တွေဖတ်ပါ။ အရင်ဆုံး ဘယ်အရာက သင့်ကို စိတ်ဝင်စားလဲဆိုတာ ရှာဖွေပါ။ ဥပမာ- ရှေးဟောင်းပစ္စည်းတွေကလား၊ သဘာဝတရားရဲ့ ပုံသဏ္ဍာန်တွေကလား၊ ဒါမှမဟုတ် လူတစ်ယောက်ရဲ့ ဘဝနေထိုင်မှုပုံစံကလား စသဖြင့်ပေါ့။
– စိတ်ကူးတွေကိုစုဆောင်းပါ (Collect): ကိုယ့်ကို ဆွဲဆောင်နိုင်တဲ့ ပုံတွေ၊ အရောင်တွေ၊ fabricsတွေ ၊ စာလုံးတွေ၊ ဆောင်းပါးတွေ၊ အရာဝတ္ထုလေးတွေကို စုဆောင်းပါ။ Physical Mood board ဆိုရင် ကပ်ခွာတွေ၊ ကော်တွေနဲ့ ကပ်ပါ။ Digital Mood board ဆိုရင် Pinterest, Milanote, PureRef လို App တွေ သုံးနိုင်ပါတယ်။
– ရွေးချယ်ပါ (Curate): အားလုံးကို စုဆောင်းပြီးပြီဆိုရင် ကိုယ့်ရဲ့ Mood board ထဲမှာ တကယ် ထည့်သွင်းသင့်တဲ့ အရာတွေကို ရွေးချယ်ပါ။ အရာအားလုံးကို ထည့်ဖို့ မကြိုးစားပါနဲ့။ ကိုယ့်ရဲ့ အဓိက အကြောင်းအရာကို ပံ့ပိုးပေးနိုင်မယ့် အရာတွေကိုပဲ ရွေးချယ်ပါ။
– ကိုယ်ပိုင်ဟန်ထည့်သွင်းပါ (Add Your Touch): Mood board ကို ကိုယ်ကိုတိုင်ရဲ့ ခံစားချက်၊ ရည်ရွယ်ချက်တွေ ထင်ဟပ်နေအောင် ဖန်တီးပါ။ ဒါမှ Collection က သင့်ရဲ့ ပုံရိပ်ကို ကိုယ်စားပြုနိုင်မှာပါ။
ဒီနေရာမှာ နာမည်ကျော် ဒီဇိုင်နာ Alexander McQueen ကို အမတို့ မှတ်မိနိုင်ပါတယ်။ သူရဲ့ Mood board တွေ၊ Inspiration တွေဟာ ရိုးရိုးရှင်းရှင်း မဟုတ်ဘဲ၊ သူ့ရဲ့ ခံစားချက်ပြင်းထန်တဲ့ စိတ်ကူးတွေကို ပုံပြင်တစ်ပုဒ်လို ဖော်ပြထားပါတယ်။ Gothic ပုံစံတွေ၊ သဘာဝတရားရဲ့ ကြမ်းတမ်းမှုတွေ၊ သမိုင်းဝင် အနုပညာလက်ရာတွေဟာ သူ့ရဲ့ Mood board တွေကနေ ပေါ်ထွက်လာပြီး အံ့မခန်း ဖက်ရှင်ပြပွဲကြီးတွေကို ဖန်တီးနိုင်ခဲ့တာပေါ့။ အမတို့အနေနဲ့လည်း ကိုယ့်ရဲ့ စိတ်ကူးတွေကို McQueen လိုပဲ ပုံပြင်တစ်ပုဒ်လို အမြင်အာရုံနဲ့ ဖော်ပြနိုင်အောင် ကြိုစိတ်ကူးထားသင့်တယ်။
(2) Mood board မှ Concept (စိတ်ကူးအမြင်) ဆီသို့
Mood board ကနေ Inspiration တွေ အများကြီးရပြီဆိုရင် နောက်တစ်ဆင့်ကတော့ အဲ့ဒီ Inspiration တွေကို Collection တစ်ခုအဖြစ် ပုံဖော်မယ့် Concept ကို ဖော်ထုတ်ဖို့ပါပဲ။ Concept ဆိုတာကတော့ သင့် Collection ရဲ့ အဓိက စိတ်ကူးအမြင်၊ ခံစားချက်၊ ဒါမှမဟုတ် ပြောချင်တဲ့ ပုံပြင်ပဲ ဖြစ်ပါတယ်။
1. Mood board ပေါ်ကပုံတွေဟာစကားပြောတတ်အောင်ဘယ်လိုဖန်တီးမလဲ?
– အဓိကအကြောင်းအရာကိုရှာဖွေပါ (Identify Core Themes):ကိုယ့် Mood board ထဲမှာ ထပ်ခါတလဲလဲ ပေါ်နေတဲ့ အရောင်တွေ၊ ပုံသဏ္ဍာန်တွေ၊ အသွင်အပြင်တွေ၊ ခံစားချက်တွေကို ရှာဖွေပါ။ ဥပမာ- ကိုယ့် Mood board ထဲမှာ လှိုင်းတွေ၊ ရေပြင်ကျယ်တွေ၊ အပြာရောင်တွေ၊ အစိမ်းရောင်တွေ အများကြီးပါနေတယ်ဆိုရင် “ပင်လယ်” နဲ့ ပတ်သက်တဲ့ Concept ကို သင် ဖန်တီးနိုင်ပါတယ်။
– အရောင်အသွေးများကိုရွေးချယ်ပါ (Develop Color Palettes): Mood board ထဲကနေ ကိုယ့် Collection အတွက် အဓိက အရောင်အသွေးတွေကို ရွေးချယ်ပါ။ Primary colors, Secondary colors, Accent colors စသဖြင့် ခွဲခြားသတ်မှတ်ပါ။
– ပိတ်စများနှင့်ပုံသဏ္ဍာန်များ (Fabrics & Silhouettes): Concept နဲ့ ကိုက်ညီမယ့် Fabrics အမျိုးအစားတွေကို စဉ်းစားပါ။ ချည်သားလား၊ ပိုးသားလား။ ဘယ်လို Silhouettes တွေက ကိုယ့်ရဲ့ Concept ကို အကောင်းဆုံး ဖော်ပြနိုင်မလဲ။ ဥပမာ- ကိုယ့်ရဲ့ Concept က “Freedom” ဆိုရင် လေထဲမှာ လွင့်နေတဲ့ ပုံသဏ္ဍာန်တွေ၊ ပေါ့ပါးတဲ့ fabrics တွေကို ရွေးချယ်သင့်ပါတယ်။
– story ဖန်တီးပါ (Create a Narrative): ကိုယ့်ရဲ့ Concept ကို ပုံပြင်တစ်ပုဒ်လို ဖန်တီးပါ။ ဒီ Collection ကို ဝတ်ဆင်သူက ဘယ်လို ခံစားရမှာလဲ။ ဘယ်နေရာကို သွားမှာလဲ။ ဘာတွေ လုပ်ဆောင်မှာလဲ။ ဒီလို ပုံပြင်ဖန်တီးခြင်းက ကိုယ့်ရဲ့ ဒီဇိုင်းတွေကို ပိုမို အဓိပ္ပါယ်ရှိစေပြီး တစ်သားတည်းကျစေပါတယ်။
ဥပမာ– မြန်မာ့ရိုးရာ ယွန်းပန်းချီကနေ Inspiration ယူမယ်ဆိုပါစို့။ ကိုယ့် Mood board မှာ ယွန်းပန်းချီရဲ့ ရွှေရောင်၊ အနက်ရောင်၊ အနီရောင်တွေ၊ ရှေးဟောင်းလက်ရာတွေရဲ့ ပုံစံတွေ၊ ပန်းတွေရဲ့ အသွင်အပြင်တွေ ပါနေမယ်။ ဒါဆိုရင် ကိုယ့်ရဲ့ Concept က “Traditional Burmese Artistry Reimagined” (ခေတ်သစ် မြန်မာ့ရိုးရာအနုပညာ) ဖြစ်နိုင်ပါတယ်။ အရောင်တွေက အနက်၊ ရွှေ၊ နီညိုရောင်တွေ ဖြစ်မယ်။ fabrics တွေကတော့ ပိုးသား၊ ကတ္တီပါလိုမျိုး စျေးကြီးပြီး သိမ်မွေ့တဲ့ fabrics တွေ ဖြစ်မယ်။ Silhouettes တွေကတော့ မြန်မာ့ရိုးရာ ဝတ်စုံတွေရဲ့ အသွင်အပြင်ကို ခေတ်မီတဲ့ ပုံစံမျိုး ပြောင်းလဲထားတဲ့ အရာတွေ ဖြစ်နိုင်ပါတယ်။
(3) Sketching and Design Development (ပုံကြမ်းဆွဲခြင်းနှင့်ဒီဇိုင်းအဆင့်ဆင့်တိုးတက်ခြင်း)
Concept ခိုင်မာပြီဆိုရင်တော့ လက်တွေ့ဆန်တဲ့ ဒီဇိုင်းတွေကို စတင်ပုံဖော်ရပါတော့မယ်။ ဒီအဆင့်မှာ ကိုယ့်ရဲ့ Mood board နဲ့ Concept ကနေ အဝတ်အစားတွေအဖြစ် ဘယ်လို ပြောင်းလဲရမလဲဆိုတာ လေ့လာကြပါမယ်။
1. အစောပိုင်းပုံကြမ်းများ (Thumbnail Sketches): စစချင်းမှာ စိတ်ထဲပေါ်လာတဲ့ ပုံစံတွေကို ချရေးပါ။ အသေးစိတ်ဆွဲစရာမလိုဘဲ မြန်မြန်ဆန်ဆန်နဲ့ Silhouettes အမျိုးမျိုး၊ အင်္ကျီလည်ပင်းပုံစံအမျိုးမျိုး၊ လက်ပုံစံအမျိုးမျိုး၊ ခါးနေရာအမြင့်အနိမ့် စသဖြင့် ပုံကြမ်းသေးသေးလေးတွေ အများကြီး ဆွဲပါ။ ဒီအဆင့်မှာ ဘယ်အရာကမှ မှားတယ်၊ မှန်တယ် မရှိပါဘူး။ စိတ်ကူးတွေကို ပုံဆွဲချပါ။
2. ပုံကြမ်းများအားပြန်လည်ပြင်ဆင်ခြင်း (Refining Sketches): အစောပိုင်း ပုံကြမ်းတွေထဲက အကောင်းဆုံးလို့ ထင်ရတဲ့ ပုံစံတွေကို ပြန်ရွေးပါ။ ပြီးရင် ဒီဇိုင်းအသေးစိတ်တွေကို ထပ်ဖြည့်စွက်ပါ။ ဥပမာ- Mood board ထဲက ပန်းပုံစံလေးတစ်ခုကို အင်္ကျီပေါ်မှာ ဘယ်လိုနေရာမှာ ပုံနှိပ်မလဲ၊ ဒါမှမဟုတ် အဲ့ဒီ ပန်းရဲ့ ပွင့်ချပ်ပုံစံကို အင်္ကျီရဲ့ လည်ပင်း၊ ဒါမှမဟုတ် လက်ပုံစံအဖြစ် ဘယ်လို ပြောင်းလဲဖန်တီးမလဲ စသဖြင့်ပေါ့။
3. လက်တွေ့ဆန်မှုနှင့်ဝတ်ဆင်နိုင်မှု (Practicality & Wearability): ဒီဇိုင်းဆွဲတဲ့အခါ အနုပညာကို ဖန်တီးနေသလိုပဲ၊ ဒီအဝတ်အစားတွေကို ဘယ်သူတွေက ဘယ်အချိန်မှာ ဘယ်လို ဝတ်ဆင်ကြမလဲဆိုတာလည်း စဉ်းစားရပါမယ်။ ကိုယ်ဖန်တီးလိုက်တဲ့ ဒီဇိုင်းက လှပပေမယ့် ဝတ်ဆင်ဖို့ အဆင်မပြေဘူးဆိုရင် ကောင်းမွန်တဲ့ ဖက်ရှင်ဒီဇိုင်းတစ်ခု ဖြစ်လာမှာ မဟုတ်ပါဘူး။ ကိုယ့်ရဲ့ Target Audience က ဘယ်သူတွေလဲ။ သူတို့ရဲ့ ဘဝနေထိုင်မှုပုံစံနဲ့ ကိုက်ညီရဲ့လား။
4. အထည်အလိပ်နှင့်ပစ္စည်းများရွေးချယ်ခြင်း (Fabric & Material Selection): ကိုယ့်ရဲ့ Concept နဲ့ Mood board ကနေ ရွေးချယ်ထားတဲ့ fabrics and materials တွေကို ဒီဇိုင်းတစ်ခုချင်းစီနဲ့ တွဲဖက်လိုက်ပါ။ ပိုးသားကို အသုံးပြုရင် ဒီဇိုင်းက ဘယ်လိုပေါ်လွင်မလဲ။ ချည်သားကို အသုံးပြုရင်ရော ဘယ်လိုဖြစ်မလဲ။ ပစ္စည်းတစ်ခုချင်းစီက ဒီဇိုင်းရဲ့ အသွင်အပြင်ကို ဘယ်လို ပြောင်းလဲစေနိုင်သလဲဆိုတာ စဉ်းစားပါ။
5. နည်းပညာပုံကြမ်းများ (Technical Flats): ဒီဇိုင်းတစ်ခုချင်းစီအတွက် အသေးစိတ်ကျတဲ့ နည်းပညာပုံကြမ်း (Flats) တွေကို ဆွဲရပါမယ်။ ဒီပုံကြမ်းတွေက အဝတ်အစားတွေကို အမှန်တကယ်ချုပ်လုပ်တဲ့အခါ အပ်ချုပ်သမားတွေ၊ ပုံစံချုပ်သူတွေအတွက် လမ်းညွှန်ချက်တွေ ပေးပါတယ်။ ဒါဟာ ဒီဇိုင်းကို လက်တွေ့အဖြစ် အသက်သွင်းဖို့အတွက် မရှိမဖြစ် လိုအပ်ပါတယ်။
– အမတို့ရဲ့ မန္တလေးမြို့က ချည်ထည်လုပ်ငန်းကို ဥပမာပေးရအောင်။ Mood board မှာ မြန်မာ့ရိုးရာ ချည်သားပုံစံတွေ၊ ပုဆိုး၊ လုံချည်တွေရဲ့ ဒီဇိုင်းတွေ ပါနေမယ်။ ဒါဆိုရင် ကိုယ်က အဲ့ဒီချည်သားဒီဇိုင်းတွေကို ခေတ်မီတဲ့ dress ပုံစံတွေ၊ jumpsuit ပုံစံတွေ ဒါမှမဟုတ် jacket ပုံစံတွေအဖြစ် ဘယ်လို ဖန်တီးမလဲ။ ပုံစံတစ်မျိုးတည်း မဟုတ်ဘဲ အမျိုးမျိုး ပြောင်းလဲဆွဲကြည့်ပါ။ လည်ပင်း၊ လက်၊ ခါးနေရာတွေကို ဘယ်လို ပြောင်းလဲရမလဲ။ အဲ့ဒီ ချည်သားကိုပဲ အခြားပစ္စည်းတွေနဲ့ ဘယ်လို တွဲဖက်မလဲ။ ဒီလိုမျိုး စဉ်းစားပြီး လက်တွေ့ဆွဲကြည့်ရပါမယ်။
(4) Building the Collection (စုစည်းမှုဒီဇိုင်းများတည်ဆောက်ခြင်း)
ဒီဇိုင်းတစ်ခုချင်းစီကို အသေးစိတ်ဆွဲပြီးပြီဆိုရင် နောက်တစ်ဆင့်ကတော့ ဒီဇိုင်းတစ်ခုချင်းစီကို တစ်သားတည်းကျတဲ့ Collection တစ်ခုအဖြစ် ပေါင်းစပ်တည်ဆောက်ဖို့ပဲ ဖြစ်ပါတယ်။ ဒီဇိုင်းတစ်ခုချင်းစီကနေ စုစည်းမှုတစ်ခုလုံးကို ဘယ်လို ညီညွတ်အောင် ဖန်တီးမလဲ?
1. ညီညွတ်မှုနှင့်စီးဆင်းမှု (Cohesion & Flow): Collection တစ်ခုဆိုတာ သီးခြားဒီဇိုင်းတွေ စုဝေးထားတာ မဟုတ်ပါဘူး။ ဒီဇိုင်းတစ်ခုချင်းစီက တစ်ခုနဲ့တစ်ခု ဆက်စပ်မှုရှိပြီး Collection တစ်ခုလုံးမှာ ညီညွတ်တဲ့ စီးဆင်းမှု ရှိရပါမယ်။ ကိုယ့်ရဲ့ Concept က Collection တစ်ခုလုံးကို ချည်နှောင်ပေးထားတဲ့ ကြိုးမျှင်ပဲ ဖြစ်ပါတယ်။
2. Collection ပုံပြင်ဖန်တီးခြင်း (Collection Story): ဖက်ရှင်ပြပွဲတစ်ခုကို စဉ်းစားကြည့်ပါ။ အဖွင့်အင်္ကျီ (Opening Look)၊ အဓိက အင်္ကျီများ (Statement Pieces)၊ နေ့စဉ်ဝတ်ဆင်နိုင်သော အင်္ကျီများ (Everyday Wear)၊ ပြီးတော့ ပိတ်တဲ့ အင်္ကျီ (Closing Look) စသဖြင့် Collection တစ်ခုလုံးကို ပုံပြင်တစ်ပုဒ်လို ဖန်တီးရပါမယ်။
Opening Look: Collection ရဲ့ အဓိက Concept ကို ချက်ချင်း ပေါ်လွင်စေမယ့် ဒီဇိုင်းဖြစ်ရပါမယ်။
Statement Pieces: Collection ရဲ့ အမှတ်အသားဖြစ်စေမယ့်၊ ထင်ရှားကျော်ကြားစေမယ့် ဒီဇိုင်းတွေဖြစ်ပါတယ်။
Everyday Wear: customer တွေ လက်တွေ့ဝတ်ဆင်နိုင်တဲ့ ဒီဇိုင်းတွေဖြစ်ပြီး စီးပွားရေးအရ အကျိုးအမြတ်ရရှိစေမယ့် ဒီဇိုင်းတွေပါ။
Closing Look: Collection ကို ခမ်းနားစွာ ပိတ်သိမ်းနိုင်မယ့် ဒီဇိုင်းဖြစ်ပါတယ်။
3. မျှတမှု (Balance): Collection တစ်ခုထဲမှာ အရောင်၊ Silhouettes၊ fabrics စတာတွေမှာ ကွဲပြားမှုတွေ ရှိသင့်ပေမယ့် ညီညွတ်မှုကလည်း အရေးကြီးပါတယ်။ ဥပမာ- ရိုးရိုးရှင်းရှင်း ဒီဇိုင်းတွေ များနေတယ်ဆိုရင် အလှဆင်ထားတဲ့ ဒီဇိုင်းတစ်ခု နှစ်ခုလောက် ထည့်ပေးတာမျိုး၊ အရောင်ဖျော့တွေ များနေတယ်ဆိုရင် အရောင်ရင့်ရင့်လေး တစ်ခု နှစ်ခု ထည့်ပေးတာမျိုး လုပ်နိုင်ပါတယ်။
4. စျေးနှုန်းနှင့်စီးပွားရေးအမြင် (Pricing & Commercial Viability): ဒီဇိုင်းတွေအားလုံးက အနုပညာဆန်နေဖို့ မလိုပါဘူး။ ရောင်းတန်းဝင်တဲ့၊ ပရိသတ် တကယ်ဝယ်ဝတ်နိုင်တဲ့ ဒီဇိုင်းတွေလည်း ပါဝင်ဖို့ လိုပါတယ်။ သင်ရဲ့ ဖက်ရှင် Brand က ဘယ်လို အဝတ်အစား အမျိုးအစားကို ဦးတည်တာလဲ။ High Fashion လား၊ Ready-to-Wear လား၊ ဒါမှမဟုတ် Fast Fashion လား။ ဒါတွေကိုလည်း စဉ်းစားရပါမယ်။
“နာမည်ကျော် ဒီဇိုင်နာ Giorgio Armani ကို ကြည့်ပါ။ သူရဲ့ Collection တွေဟာ အမြဲတမ်း ရှင်းလင်းပြီး သန့်စင်တဲ့ ပုံစံရှိပါတယ်။ သူက fabrics ကောင်းတွေ၊ ရိုးရှင်းတဲ့ Silhouettes တွေ၊ ပြီးတော့ သိမ်မွေ့တဲ့ အရောင်တွေကို အမြဲသုံးပါတယ်။ ဒါပေမယ့် သူရဲ့ Collection တစ်ခုလုံးကို ကြည့်လိုက်ရင် ညီညွတ်တဲ့ ခံစားချက်တစ်ခု ရှိနေပြီး ဘယ်ဒီဇိုင်းကမှ သီးခြားစီ ထွက်မနေတာကို တွေ့ရပါလိမ့်မယ်။”
(5) The Iterative Process and Feedback (အဆင့်ဆင့်ပြန်လည်ပြင်ဆင်ခြင်းနှင့်အကြံပြုချက်များ)
ဖက်ရှင်ဒီဇိုင်းလုပ်ငန်းစဉ်ဆိုတာ တည့်တည့်သွားတဲ့ လမ်းကြောင်းမျိုး မဟုတ်ပါဘူး။ ဒါဟာ အဆင့်ဆင့် ပြန်လည်ပြင်ဆင်ရတဲ့ (Iterative Process) ဖြစ်ပါတယ်။ ကိုယ့် Mood board ကနေ Concept ထုတ်တယ်။ ပြီးရင် ဒီဇိုင်းဆွဲတယ်။ တခါတလေ ဒီဇိုင်းဆွဲနေရင်းနဲ့ Mood board ကို ပြန်ကြည့်ဖို့၊ ဒါမှမဟုတ် အသစ်ထပ်ထည့်ဖို့ လိုအပ်နိုင်ပါတယ်။ Collection တစ်ခုလုံးကို တည်ဆောက်ပြီးစီးသွားပြီဆိုရင်လည်း ပြီးပြည့်စုံပြီလို့ မဆိုနိုင်ပါဘူး။
1. အကြံပြုချက်များ (Feedback): ကိုယ့်ရဲ့ ဒီဇိုင်းတွေကို ဆရာတွေ၊ လုပ်ဖော်ကိုင်ဖက်တွေ ဒါမှမဟုတ် ယုံကြည်ရတဲ့ မိတ်ဆွေတွေကို ပြသပြီး အကြံဥာဏ်တောင်းခံပါ။ သူတို့ရဲ့ အမြင်က ကိုယ့်ရဲ့ ဒီဇိုင်းတွေကို ပိုမိုကောင်းမွန်အောင် ကူညီပေးနိုင်ပါတယ်။ ပွင့်လင်းမြင်သာစွာ လက်ခံပြီး ပြုပြင်သင့်တာတွေကို ပြုပြင်ပါ။
2. ပြန်လည်ပြုပြင်ခြင်း (Refinement): ရရှိလာတဲ့ အကြံဥာဏ်တွေနဲ့ ကိုယ့်ရဲ့ အတွေးအမြင်တွေကို ပေါင်းစပ်ပြီး ဒီဇိုင်းတွေကို ထပ်မံ ပြုပြင်ပြောင်းလဲပါ။
ဖက်ရှင်ဒီဇိုင်း ဖန်တီးမှုလုပ်ငန်းစဉ်ဟာ စိန်ခေါ်မှုတွေ များပြားပေမယ့် စိတ်လှုပ်ရှားစရာ ကောင်းတဲ့ ခရီးလမ်းတစ်ခုပါ။ Mood board ကနေစပြီး Collection တစ်ခုအဖြစ် ပုံဖော်လိုက်တဲ့အခါ ကိုယ့်ရဲ့ စိတ်ကူးစိတ်သန်းတွေကို လက်တွေ့ဘဝထဲကို အသက်သွင်းနိုင်မှာ ဖြစ်ပါတယ်။
အဓိက အချက်တွေကတော့-
– စိတ်အားထက်သန်မှု (Passion): ကိုယ် ဘာကို ဖန်တီးချင်တာလဲဆိုတဲ့ စိတ်အားထက်သန်မှု ရှိရပါမယ်။
– သုတေသနပြုမှု (Research): အမြဲတမ်း လေ့လာသင်ယူပြီး စိတ်ကူးအသစ်တွေ ရှာဖွေပါ။
– စနစ်တကျဖန်တီးမှု (Systematic Approach): Mood board ကနေစပြီး Concept, Sketch, Collection အဆင့်ဆင့်ကို စနစ်တကျ လိုက်နာပါ။
– ပွင့်လင်းစိတ်ထား (Openness): အကြံပြုချက်တွေကို ပွင့်ပွင့်လင်းလင်း နားထောင်ပြီး ပြုပြင်ပြောင်းလဲဖို့ မကြောက်ပါနဲ့။
အမတို့အားလုံးဟာ ကိုယ်ပိုင်ထူးခြားတဲ့ ဒီဇိုင်နာတွေ ဖြစ်လာနိုင်စွမ်းရှိပါတယ်။ ဒီအဆင့်တွေကို စနစ်တကျ လေ့ကျင့်ပြီး ကိုယ့်ရဲ့ ဖက်ရှင်အိပ်မက်တွေကို အကောင်အထည် ဖော်နိုင်ကြပါစေလို့ ဆုတောင်းပေးလိုက်ပါတယ်နော်။ နောင်နှစ်တွေမှာ အားလုံးရဲ့ Collection တွေကို ဖက်ရှင်ပြပွဲကြီးတွေမှာ မြင်တွေ့ရဖို့ အမ မျှော်လင့်နေပါ့မယ်။